Tatarstan Respublikası basshısı Respublikamızǵa xızmet saparı dawamında Qaraqalpaqstan Respublikası Joqarģı Keńesi Baslıģı menen bir qatar tarawlarda birge islesiw, tájriybe almasıw máselesi boyınsha is-ilajlar rejesin tastıyıqlaǵan edi.
Dúzilgen birge islesiw rejesinde eki Respublika ortasında Joqarı hám professional bilimlendiriw sistemasında alıp barılıp atırǵan jumıslar boyınsha tájriybe almasıw, bul baǵdardaǵı eki tárepleme paydalı birge islesiwlerdi jolǵa qoyıw ayrıqsha atap kórsetilgen edi.
Mine sol rejege tiykar, usı jıldıń 2-may kúni Qaraqalpaqstan Respublikası Joqarı bilimlendiriw, ilim hám innovaciyalar ministri B.T.Kaipbergenov, Muhammed al-Xorezmiy atındaģı TITU Nókis filialı direktorı w.w.a. R.I.Oteniyazov hám ministrlik delegaciyası Tatarstan Respublikasına xızmet saparı menen bardı.
Respublikamız delegaciyasın Tatarstan Respublikası bilimlendiriw hám ilim ministri I.G.Xadiullin hám ministrlik delegaciyası kútip aldı.
Ushırasıwda eki Respublika joqarı hám professional bilimlendiriw sistemalarınıń búgingi jaǵdayı, alıp barılıp atırǵan oqıw metodları, sol menen birge IT tarawın rawajlandırıw barısında alıp barılıp atırģan jumıslar haqqında sóz bardı. Onnan soń, Tatarstan Respublikasındaǵı oqıw orınları hám olar menen jaqınnan tanısıw, máselelerdi ornında úyreniw baǵdarında kelisimge kelinip, Tatarstan Ministrligi delegaciyamızǵa kerekli barlıq shárayatlardı jaratıp beretuǵınlıǵın bildirdi.
Xızmet saparınan tiykarǵı gózlengen maqset Tatarstandaǵı IT tarawındaģı joqarı oqıw orınların jaqınnan úyreniw, birge islesiw baǵdarların ele de jetilistiriw hám sol jónelislerden kelip shıqqan halda Tatarstan Ministrligi menen memarandum hám shártnamalar dúziw esaplanadı.
