Búgin Muhammed al-Xorezmiy atındaǵı Tashkent informaciya texnologiyaları universiteti Nókis filialı direktorı B.Kaipbergenov penen I.V.Savickiy atındaǵı Qaraqalpaqstan kórkem-óneri muzeyi direktorı T.Mkrtıchev muzeydiń informaciya texnologiya baǵdarında jumıs alıp baratuǵın xızmetkerleriniń bilimin asırıw, informaciyalıq qáwipsizlik, baǵdarlamalıq serverlik úskenelew sıyaqlı bir neshe jónelislerde oqıtıw boyınsha memorandumǵa qol qoyıstı.
Kompyuter sawatxanlıǵın asırıw isleri TITU Nókis filialı janınan ashılǵan «Elektron xúkimet» oqıw orayı tárepinen alıp barıladı. Oray wákilleri qatnasıwshılar menen ushırasıp, oqıw baǵdarları hám grafiklerin belgilep aldı.
Úlken jańalıqlardan biri — endigiden Filialımız studentleri tek ǵana studentlik gúwalıǵın kórsetken halda, biypul «Sahradaǵı Luvr» ataması menen dúnyaǵa tanımalı bolǵan I.V.Savickiy atındaǵı Qaraqalpaqstan kórkem-óneri muzeyin tamashalawı kútilmekte.