Zamanago’y kompyuter ha’m informatsiya texnologiyalarını ekonomika, pa’n ha’m ta’limnin’ ba’rshe tarawlarına ken’nen engiziw, xalıqaralıq standartlarına sa’y qalda informatika sistemalarına kirip barıwımız ha’reketlerimizdin’ biri esaplanadı.
Izleniwshen’, jan’alıqqa janı qumar ja’miyetimiz ushın jan’a texnolog kadrlardı tayarlap, ilimge qushtarı burkip turg’an bakalavr ha’m magistr jas qa’negelerdi tayarlap, rawajlang’an ma’mleketler qatarına o’z u’leslerini qosıp atırg’an joqarı oqıw da’rgaylarınan biri Muxammed al-Xorezmiy atındag’ı Tashkent informatsiyalıq texnologiyaları universiteti No’kis filialı esaplanadı.
2017 – jıl «Xalıq penen pikilemiw ha’m insan ma’pleri jılı» ha’mde «O’zbekistan Respublikası G’a’rezsizliginin’ 26 jıllıg’ı»na bag’ıshlang’an «Pida’yın’ bolg’aymız senin’ O’zbekistan!» su’yreni tiykarında pitkeriwshilerge qa’nigeligi boyınsha diplom tapsırıw keshesi saltanatlı tu’rde «Tabıslar, Sizge a’ziz pitkeriwshi» atamasında bolıp o’tti.
Keshege bakalavr ha’m magistratura pitkeriwshilari, ata-analar, filial professor oqıtıwshıları ha’m bir qatar orınlardan miymanlar qatnastı.
Kesheni filial oqıw ha’m ilmiy isleri boyınsha direktor orınbasarı X. Seytkamalov ashıp berdi ha’m oqıw ornının’ ilim, bilimlendiriw, ag’artıwshılıq ha’m sport tarawlarındag’ı jetiskenliklerine ken’nen toqtap o’tti.
Filialımızda O’zbekistan Respublikası Prezidentinin’ 2014 jıl 6 fevraldag’ı «O’zbekistan Respublikasında 2017 jılda jaslarg’a tiyisli ma’mleketlik siyasattı a’melge asırıwg’a qaratılg’an qosımsha is-ilajlar haqqında»g’ı PQ-2124-sanlı Qararı tiykarında islep shıg’ılg’an is-ilajlar a’melge asırılıp atırg’an bir payıtta sho’lkemlestirilgen bu’gingi pitkeriw keshesi Erkin ha’m abat turmıs qurıw jolında rawajlanıwdın’ jan’a basqıshın baslap bergen tariyxıy waqıya sıpatında ha’r birimizdin’ anag’a bolg’an mehir-muxabbatımız sıyaqlı qa’lbimizden teren’ orın iyeleydi.
Muxammed al-Xorezmiy atındag’ı TITU No’kis filialının’ ashılıwı da informatsiyalıq texnologiyalarg’a qızıg’ıwshı jas da’stu’rshı jaslarına ken’ imkaniyatlar esigin ashıp berdi. 2006-2017 jıllar aralıg’ında Muxammed al-Xorezmiy atındag’ı TITU No’kis filialın 1048 student bakalavr bag’darın ha’m 71 student magistr qa’nigeligin pitkerip shıqtı.
Bıyılg’ı jılı Muxammed al-Xorezmiy atındag’ı TITU No’kis filialın «Kompyuter injiniringi» qa’nigeligi boyınsha 8 magistr ha’m 4 ta’lim bag’darı boyınsha 126 bakalavr pitkeriwshiler dissertatsiya ha’m pitkeriw qa’nigelik diplom jumısların tabıslı qorg’ap pitkerip shıqtı.
Filial professor oqıtıwshılarının’ shet eldegi joqarı oqıw orınlarına barıp, o’z bilim ha’m ko’nlikpelerin asırıp kelmekte. Al, student jaslarımız bolsa bir qansha ko’rik tan’lawlar pa’n olimpiadalar da belsendi qatnasıp u’lken tabıslarg’a eristi.
Atap o’tetug’ın bolsaq, 2016-2017 oqıw jılında Tashkent qalasında «Jaslar ha’pteligi» ilajında “Tatıw” studentler teatr studiyası da qatnastı. Olar ta’repinen tayarlang’an “Qaydasan’, baxtım?” spektakli “Mehir aqıbet sezimlerini oyatıwshı spektakl” nominatsiyasına mu’na’sip dep tabılıp, 3-orındı iyelegen bolsa. «TATU» Quwnaqlar ha’m ziyrekler komandası Qaraqalpaqstan Respulikası joqarı oqıw orınları arasında 1 orındı iyelewge miyasar boldı.
Bilimlendiriw da’rgaylarında qa’biletli jaslardı anıqlaw, olardı xoshametlew arqalı basqalarg’a ibrat etip ko’rsetiw ushın tu’rli tan’lawlar o’tkeriw, ma’mleketlik stipendiyalar sho’lkemlestiriw da’stu’rge aylang’an. Prezident, Ibn Sino, Nawayı, Beruniy, Ulug’bek, Berdaq, I.YUsupov kibi stipendiyaları qatarı joqarı oqıw orınları arasında ha’r jılı O’zbekistan Respublikası Informatsiyalıq texnologiyaların ha’m kommunikatsiyaların rawajlandırıw ministrligi stipendiyası, O’zbekistan radiotexnika, elektronika ha’m baylanıs ilimiy-texnika ja’miyeti stipendiyası, «Jaslar awqamı» stipendiyası tan’lawları o’tkerilip kelinbekte.
Filialımızda 5 student o’zlerinin’ bag’darlamaları menen usı stipendiyalarg’a qatnasıp, jaqsı na’tiyjelerge eristi. Olar arasınan Kompyuter injiniringi fakulteti studentleri M.Quvvatova O’zbekistan Respublikası Informatsiyalıq texnologiyaların ha’m kommunikatsiyaların rawajlandırıw ministrligi stipendiyası, A.Orınbaeva O’zbekistan radiotexnika, elektronika ha’m baylanıs ilimiy-texnika ja’miyeti stipendiyasın qolg’a kirgizdi. Al, N.Allambergenov, R.Bazarbaev, A.Orınbaevalar «Jaslar awqamı » stipendiantı bolıw baxtına eristi.
Filial ko’leminde erisilgen barlıq tabıs ha’m jetiskenlikler usı oqıw da’rgayında bilim berip atırg’an professor-oqıtıwshılar pida’yı janku’yer miynetinin’, barlıq, ku’sh jigerinin’ na’tiyjesi bolıp tabıladı.
Ma’mleketimizdin’ barlıq tarawlarının’ rawajlanıwına o’z u’leslerin qosatug’ın bakalavr ha’m magistratura basqıshlarında ustazlarınan alg’an bilimlerin o’ndiris orınlarında qollanıp, ma’mleketimizdin’ baylanıs ha’m telekommunikatsiya tarawının’ rawajlanıwına o’z u’leslerin qosadı degen u’lken isenim bildire alamız.
Salamat AVEZOV
Muxammed al-Xorezmiy atındag’ı Tashkent informatsiyalıq texnologiyaları
universiteti No’kis filialı «Oqıw ja’rdemshi bo’limi»nin’ laborantı.