Elimizde sanlı texnologiyalar baǵdarında jaratılǵan imkaniyatlar
8-aprel kúni Muhammed al-Xorezmiy atındaǵı TITU Nókis filialında "Ózbekstan Respublikasında sanlı texnologiyalar baǵdarında jaratılǵan imkaniyatlar" atamasında ushırasıw shólkemlestirildi.
Ushırasıwda Ózbekstan Respublikası Sanlı texnologiyalar ministrliginiń wákilleri, tiyisli qánigeler, filial basshıları, professor-oqıtıwshılar hám studentler qatnastı.
Ilajdıń tiykarǵı maqseti - student-jaslardı mámleketimizde IT tarawında ámelge asırılıp atırǵan reformalar, jaratılıp atırǵan sharayatlar, bilimlendiriw hám kásiplik rawajlanıwdaǵı jańa baǵdarlar menen jaqınnan tanıstırıwdan ibarat boldı.
Ushırasıw dawamında Sanlı texnologiyalar tarawında mámleket tárepinen berilip atırǵan imkaniyatlar hám grant baǵdarlamaları, jaslar ushın mólsherlengen "IT Park" joybarları hám rezidentlik imkaniyatları, xalıqaralıq IT sertifikatlarınıń (CompTIA, Cisco, Microsoft hám basqalar) áhmiyeti hám olardı qolǵa kirgiziw boyınsha kórsetpeler, mámleketimizde jaslar erisip atırǵan xalıqaralıq IT jetiskenlikleri hám tabıslı joybarları, jasalma intellekt (AI) baǵdarında alıp barılıp atırǵan qollanbalar hám zamanagóy texnologiyalardıń jámiyetke tásiri sıyaqlı máselelerge ayrıqsha itibar qaratıldı.
Ministrlik spikerleri jaslarǵa óz bilim hám tájiriybeleri tiykarında bahalı másláhátler berip, olar ushın bar imkaniyatlardan durıs paydalanıw boyınsha motivaciyalıq bayanatlar ótkerdi.
Bunday ushırasıwlar jaslardı sanlı tarawda belsendi bolıwǵa, óz ústinde tınımsız islewge hám global maydanda básekige shıdamlı qánige bolıwǵa shaqıradı.
