Sırt el investorları filialımızda boldı
"Ózbekstan-Qıtay" biznes forumı sheńberinde Nókis qalasına kelgen Qıtay Xalıq Respublikasınıń bir qatar IT kompaniyalarınıń wákilleri Muhammad al-Xorezmiy atındaǵı TITU Nókis filialında boldı. Bir qatar juwapkerler tárepinen miymanlar filial iskerligi menen jaqınnan tanıstırıldı. Sonday-aq, olar jańadan shólkemlestirilgen Nókis mámleketlik texnika universiteti menen de tanıstı.
Filial direktorı orınbasarları X.Seytkamalov, B.Aymuratov, Kompyuter injiniringi fakulteti dekanı T.Berdimbetov, Xalıqaralıq birge islesiw bólimi baslıǵı A.Kayıpova, Nókis mámleketlik texnika universiteti prorektorı M.Artikbayevlar qatnasıwında bolıp ótken ushırasıwda Qıtay IT kompaniyaları, olardıń xızmet hám ónimlerin Qaraqalpaqstan bazarına alıp kiriw, aymaq jaslarınıń bántligin támiyinlewde xalıqaralıq birge islesiwdi jolǵa qoyıw sıyaqlı máseleler sóz etildi.
Sonday-aq, investorlar Qaraqalpaqstan IT bazarındaǵı jaǵday hám bul bazarda filialda jetisip shıǵıp atırǵan jas kadrlardıń ornı menen de qızıqtı. Keleshekte birge islesiwdi jolǵa qoyıw boyınsha bir qatar rejeler dodalandı.
Ushırasıw juwmaǵında Nókis mámleketlik texnika universiteti hám sırt el IT kompaniyası arasında birge islesiwdi jolǵa qoyıw boyınsha shártnamaǵa qol qoyıldı.
Bunnan soń miymanlar filialda oqıp atırǵan student-jaslardıń sabaq procesi menen tanısıw menen birge olardıń sorawlarına da juwap berdi.