14-fevral - ullı oyshıl, mámleketlik ǵayratker Zahiriddin Muhammad Babur tuwılǵan kún
Túrkiy ádebiyattıń eń belgili wákilleriniń biri, óziniń unamlı jumısı hám kúshli siyasatı menen dúnya tariyxında óshpes at qaldırǵan ullı patsha hám shayır Zahriddin Muhammed Babur ádebiyattanıwshı, tariyxshı ilimpaz hám shayır sıpatında xalqımızdıń ruwxıy mádeniyatı tariyxında múnásip orın ielegen.
Babur óziniń áskeriy talantı hám siyasiy ziyrekligi menen 1526-jılı Hindstanda Baburiyler dinastiyasına tiykar saldı. Onıń basqarıwı nátiyjesinde Hindstan tariyxında jańa dáwir baslandı - oraylasqan mámleket qurıldı, mádeniyat hám ilim rawajlandı.
Baburdıń "Baburnama" shıǵarması óz dáwiriniń siyrek ushırasatuǵın tariyxıy hújjeti bolıp, onda XVI ásirdiń siyasiy hám jámiyetlik turmısı tolıq súwretlengen. Sonday-aq, onıń ǵázelleri hám rubayları ózbek ádebiyatınıń dúrdanalarınan esaplanadı. Babur parsı hám túrkiy tillerde dóretiwshilik penen shuǵıllanǵan, ádebiy miyrasında tábiyat, watan hám turmıstıń hár qıylı tárepleri sáwlelengen.
"Baburnama" tek ǵana tariyxıy shıġarma emes, bálkim tábiyattanıw hám geografiya boyınsha da áhmiyetli derek esaplanadı. Onda Oraylıq Aziya hám Hindstannıń ósimlik hám haywanat dúnyası haqqında bahalı maǵlıwmatlar berilgen.
Búgingi kúnde Babur tek ǵana tariyxıy shaxs emes, al milliy maqtanısh tımsalı sıpatında tán alınadı. Onıń dóretiwshiligi hám ilimiy jumısları tek ǵana ózbek xalqınıń emes, al pútkil dúnya mádeniy miyrasınıń ajıralmas bólegi bolıp esaplanadı.