Filialdıń lawazımlı shaxslarınıń qatnasıwında májilis ótkerildi
Muhammad al-Xorezmiy atındaǵı TITU Nókis filialında filial direktorınıń másláhátshisi J.Djumabekov, Oqıw isleri boyınsha direktor orınbasarı X.Seytkamalov, kafedralardıń baslıqları hám bólim baslıqlarınıń qatnasıwında májilis ótkerildi.
Májiliste jaqınlasıp kiyatırǵan juwmaqlawshı qadaǵalaw imtixanlarında itibar qaratılıwı kerek bolǵan tárepleri, imtixanlar hám olardıń bahalaw normalarına kirgizilgen ózgerisler haqqında hár tárepleme maǵlıwmat berildi.
Usı oqıw jılınan juwmaqlawshı imtixanlar arnawlı videobaqlaw kameraları menen úskenelengen auditoriyalarda ótkeriliwi, videojazıwlardıń saqlanıw múddetleri uzaytırılǵanı hám bulardıń barlıǵı imtixanlardıń ashıq-aydınlıǵın támiyinlew maqsetinde ámelge asırılıp atırǵanı atap ótildi.
Sonday-aq, ushırasıw dawamında Ózbekstan Respublikası joqarı bilimlendiriw, ilim hám innovaciyalar ministriniń 2024-jıl 4-noyabrdegi "Joqarı bilimlendiriw shólkemlerinde engizilgen málimleme sistemalarınan paydalanıw boyınsha reglamentti tastıyıqlaw haqqında"ǵı 412-sanlı, 2024-jıl 2-dekabrdegi "Joqarı bilimlendiriw shólkemlerinde studentlerdiń bilimin bahalaw hám qadaǵalaw tártibin jetilistiriw haqqında"ǵı 452-sanlı buyrıqlar hám olardıń bántleri haqqında maǵlıwmatlar berildi.