Docentimiz Erasmus + hám Milliy informaciya kúninde óz prezentaciyası menen qatnastı
2024-jıl 6-dekabr kúni Ózbekstanda Erasmus+ Milliy málimleme kúninde Erasmus+ baǵdarlamasınıń 2025-tańlawı rásmiy baslanıwı járiyalandı. Tashkent mámleketlik texnika universitetinde bolıp ótken ilájda joqarı bilimlendiriw mákemeleriniń wákilleri, Evropa Awqamına aǵza mámleketlerdiń elshixanaları, xalıqaralıq shólkemler hám mápdar tárepler qatnasıp Evropa Awqamı hám Ózbekstan arasındaǵı birge islesiwdiń 30 jıllıǵın belgiledi.
Iláj Evropa Awqamınıń Ózbekstandaǵı elshisi Ullı Mártebeli Toivo Klaar mırza, Joqarı bilimlendiriw, ilim hám innovaciyalar ministriniń birinshi orınbasarı Shahrux Daliyev hám TMTU rektorı, akademik Sadritdin Turabdjanovtıń kirisiw sózleri menen baslandı.
Qatnasıwshılarǵa tabıslı Erasmus+ baslamaların kórsetetuǵın Joybarlar yarmarkası, 2025-jılǵı Erasmus+ tańlawı haqqında túsinikler, sonıń ishinde, CBHE, ICM, Erasmus Mundus, Jean Monnet hám Marie Skłodowska-Curie baǵdarlamaları imkaniyatları hám tańlawǵa joybar tapsırıwshılar ushın aldıńǵı tájiriybeler, networking hám kórsetpeler boyınsha interaktiv sessiyalar usınıldı.
Ilájda filialımız jámááti aǵzası, Informaciya texnologiyalari kafedrasi baslıǵı, docent Asiya Tureniyazova Joqarı bilimlendiriw reformaları eksperti sıpatında "Enhancing University-Industry Collaboration for Current and Future Employment, Innovation, and Sustainable Ecosystems" temasındaǵı prezentaciyası menen qatnastı.
