«Til millet maqtanıshı!»
1989-jıl 1-dekabr kúni Qaraqalpaqstan Respublikası Joqarǵı Keńesiniń sessiyasında qaraqalpaq tiline mámleketlik til biyligi berildi. Mine kózdi ashıp jumǵansha Ana tilimiz 35 jastı qarsı almaqta.
Sáne múnásibeti menen usı jıldıń 29-noyabr kúni Muhammed al-Xorezmiy atındaǵı TITU Nókis filialı "Telekommunikaciya texnologiyaları hám kásiplik tálim" fakultetinde Qaraqalpaq tiline til biyligi berilgenliginiń 35 jıllıǵı hám de Berdaq Ǵarǵabay ulınıń 197 jıllıǵına baǵıshlanǵan «Til millet maqtanıshı!» atamasında ushırasıw hám teatrlastırılǵan ádebiy bayram keshesi bolıp ótti.
Ushırasıw keshesine fakultet dekanı PhD B.Fayzullaev Nókis Innovaciyalıq institutı Filologiya kafedrası docenti PhD Z.Daniyarova, filial Hayal-qızlar máseleleri boyınsha direktor másláhátshisi A.Tumaeva, dekan orınbasarı U.Turumbetov, professor-oqıtıwshılar H.Omarova, U.Maxambetova, tyutorlar hám de student-jaslar qatnastı.
Iláj dawamında sózge shıqqanlar qaraqalpaq tiliniń tariyxı, kelip shıǵıwı, qaraqalpaq ádebiyatı tuwralı keń maǵlıwmatlar berip ótti hám de bársheni Qaraqalpaq tiline mámleketlik til biyligi berilgen kún menen qutlıqladı.
Bayram keshesi student-jaslar tárepinen tayarlanǵan ayaq oyın hám teatrlastırılǵan saxnalıq kórinisler menen dawam etti. Bul óz gezeginde miymanlarǵa ózgeshe kewil-keypiyat baǵıshladı hám de tásirler qaldırdı.
