«Mártebeń bálent bolsın, ana tilim!»
Házirgi waqıtta dúnyada altı mıńnan aslam tiller bolǵanı menen, olardıń tek 170 ten aslamı óziniń mámleketlik til statusına iye. Olar arasında qaraqalpaq tiliniń de bar ekenligi úlken quwanısh hám maqtanısh bolıp tabıladı.
Qaraqalpaq tiline mámleketlik til biyliginiń beriliwi xalqımızdıń ózligin ańlawı, ǵárezsiz turmısta ómir súriwi hám ata-babalardan miyras bolıp kiyatırǵan milliy miyraslarımız, qádiriyatlarımızdı qásterlep-saqlap, keleshek áwladlarǵa jetkerip beriwdey ullı iste taslanǵan áhmiyetli, tariyxıy qádem boldı.
Bunnan sarras 35 jıl aldın – 1989-jıl 1-dekabr kúni Qaraqalpaqstan Respublikası Joqarǵı Keńesiniń sessiyasında qaraqalpaq tiline mámleketlik til biyligi berildi.
Sáne múnásibeti menen Muhammed al-Xorezmiy atındaǵı TITU Nókis filialı "Kompyuter injiniringi" fakultetinde «Mártebeń bálent bolsın, ana tilim!» atamasında ushırasıw hám bayram keshesi bolıp ótti.
Ushırasıwdı Oqıw isleri boyınsha direktor orınbasarı X.Seytkamalov ashıp berdi. Onda ilimler akademiyası Qaraqalpaqstan bólimi Qaraqalpaq gumanitar ilimler ilim-izertlew institutı, filologiya ilimleriniń kandidatı, docent Q.Bekbergenov, Ilimler akademiyası Qaraqalpaqstan bólimi Qaraqalpaq gumanitar ilimler ilim-izertlew institutı, folklor bóliminiń baslıǵı, PhD P.Óteniyazov, "Ózbek tili hám shet tiller kafedrası" baslıǵı U.Jaqsimovalar sózge shıǵıp qaraqalpaq tiliniń tariyxı, kelip shıǵıwı, qaraqalpaq ádebiyatı tuwralı keń maǵlıwmatlar berip ótti.
Bunnan keyin, "Ózbek tili hám shet tiller kafedrası" oqıtıwshılar hám student-jasları qatnasındaǵı bayram keshesine náwbet berildi.
Baqsı hám jırawlardıń shıǵıwları, qosıq hám ayaq oyınlar kesheniń joqarı keypiyatta dawam etiwine sebep boldı.
