TITU Nókis filialında pitkeriwshi student-jaslarǵa diplom tapsırıw máresimi bolıp ótti
Búgin Muhammed al-Xorezmiy atındaģı TITU Nókis filialında 2023/2024-oqıw jılında magistr hám bakalavr kúndizgi tálim formasın pitkeriwshi kurs student-jaslarına diplom tapsırıw máresimi bolıp ótti.
Ilajda Ózbekstan Respublikası Sanlı texnologiyalar ministrligi Qaraqalpaqstan Respublikası basqarması sektor baslıǵı T.Baekeev, filial direktorı w.w.a., t.i.d., professor R.Oteniyazov, Ózbektelekom AK QR filialı direktorı orınbasarı O.Djumaniyazov, Qaraqalpaqstan radioteletarqatıw orayı direktorı A.Utemuratov, Elektromagnit sıyımlılıq orayı mámleketlik unitar kárxanası QR elektromagnit sıyımlılıq xızmeti baslıǵı I.Reimovlar sózge shıǵıp, pitkeriwshilerdi qutlıqladı.
Onnan soń ilaj qatnasıwshıları hám pitkeriwshi student-jaslardıń ata-anaları sózge shıǵıp, búgin ullı dárgaydı pitkerip atırǵan jaslarǵa, keleshekte ustazlarınan alǵan bilimlerin mámleketimiz rawajlanıwı jolında ayanbay xızmet etetuǵın jetik kadrlar bolıp jetilisiwine isenim bildirdip, olarǵa áwmetler tiledi. Al pitkeriwshi jaslar bolsa, filialımız ustazlarına, professor oqıtıwshılarına bergen bilimi ushın ózleriniń sheksiz minnetdarshılıǵın bildirdi.
Maǵlıwmat ushın, 2023/2024-oqıw jılında Muhammed al-Xorezmiy atındaǵı Tashkent Informaciyalıq texnologiyaları universiteti Nókis filialında magistratura basqıshın 6 student, bakalavr basqıshın 242 student pitkergen bolsa, sonnan 3 student bakalavr basqıshın ayrıqsha bahalarǵa pitkeriwge miyassar boldı.
Bizde óz gezeginde filialımız pitkeriwshi student-jaslarına aldaǵı jumıslarında tabıslar tilep, hámme waqıt párwazları bálent bolıwın tilep qalamız.
