Qazaqstan Respublikasındag’ı Xalıqaralıq infomatsiyalıq texnologiyalar universiteti IT (informatsiyalıq texnologiyalar) qa’nigelerin tayarlawda Orta Aziyada jetekshi orındı iyeleydi.
2018-jıldın’ 23-noyabr ku’ni usı universitet oqıtıwshıları pedogogika ilimlerinin’ doktorı Gulnara Zakirova ha’mde texnika ilimlerinin’ doktorı, Resey Akademiyası professorı Serbin Vasiliy Valerevichler ta’repinen TITU No’kis filialında seminar-trening sho’lkemlestirildi.
Seminar-trening dawamında AQSH ha’m Evropa ma’mleketlerinin’ joqarı oqıw orınlarında ken’ tarqalg’an kredit ta’lim sistemasının’ abzallıg’ı, jan’a bahalaw usılları,studentlerdin’ jeke jumıs alıp barıwında ha’m elektron tapsırmalardı orınlawdag’ı qolaylıqları boyınsha tu’sinikler berilip o’tti.
Sonday-aq, seminarda aqıllı (smart) mobil qurılmalar arqalı studentlerge interaktiv usılda bekkemlew shınıg’ıwların o’tkeriw boyınsha xalıqaralıq ta’jiriybeler tiykarında oqıtıwshılar o’z usınısların bildirip o’tti.
A’lbette, aldıng’ı ko’z qaras bu’gingi da’wirge tuwra kelmeydi. Sonlıqtan bunday seminar-treningler jan’a innovatsiyalıq, texnologiyalıq ideyalardı ja’nede rawajlandırıwda u’lken ahmiyetke iye. Sebebi, innovatsiyalıq strategiyalar tarawın rawajlandırıwda u’lken ku’sh bul IT qa’nigeleri bolıp esaplanadı.
TITU No’kis filialı Baspaso’z xızmeti