Алдын хабар берип өткен едик, Мойнақ районында Өзбекстан Республикасы Президентиниң социаллық ҳәм руўхый ағартыўшылық тараўларға тийисли 5 басламасы тийкарында “Future Muynak” хабар технологиялары ҳәм китап оқытыўға үйретиў оқыў орайы ашылыўы режелестирилмекте. Бүгинги күнде орай ушын жаңа бинаның қурылыс ислери әмелге асырылмақта.
“Future Muynak” орайының мақсети жасларды жоқары сыпатлы оқытыў сол тийкарда инновациялық таярлаў системасын раўажландырыў, аймақлық ҳәм халықаралық хабар технологиялары тараўына интеграция қылыў, Мойнақ районын санлы экономика тийкарында раўажландырыў саналады.
Сол тийкарда Ташкент информациялық технологиялары университети Нөкис филиалы профессор-оқытыўшылары тәрепинен “Future Muynak” орайы ушын таңлап алынған тренерлерди оқытыў мақсетинде семинар-тренинг шөлкемлестирилди.
Семинар-тренинг даўамында қантасыўшыларға программаластырыў,комьютер анимациясы,2D графика 3D моделлестириў бағдары бойынша толық түсиниклер берилди.
Мағлыўмат сыпатында атап өтемиз, Орайда оқыў тийкарынан 4 бағдарда яғный, анимация, веб дизайн,кино видео өнимлерин,компьютер ойынларын ислеп шығарыў. Сондай-ақ оқыўшыларға сабақлар даўамында программаластырыў,комьютер анимациясы,2D графика 3D моделлестириўде үйретиледи.
ТАТУ Нөкис филиалы Баспасөз хызмети